បន្ទាយមានជ័យ ៖ អាជ្ញាធរជាតិដោះស្រាយវិវាទក្រៅប្រព័ន្ធតុលាការ កំណត់យកខេត្តបន្ទាយមានជ័យ ជាខេត្តគោលដៅ ទី ៣ បន្ទាប់ពីខេត្តបាត់ដំបង និងខេត្តកណ្តាល នៃបេសកកម្មនៃអាជ្ញាធរជាតិដោះស្រាយវិវាទក្រៅប្រព័ន្ធតុលាការ ដើម្បីជាយន្តការបំពេញបន្ថែមឱ្យប្រព័ន្ធដោះស្រាយវិវាទបច្ចុប្បន្ននៅកម្ពុជា សំដៅលើកកម្ពស់គុណភាព ប្រសិទ្ធភាព និងភាពឆាប់រហ័សនៃការដោះស្រាយវិវាទ តាមរយៈការសម្រុះសម្រួលផ្សះផ្សាក្រៅប្រព័ន្ធតុលាការ ដែលចូលរួមចំណែកអភិវឌ្ឍន៍ប្រព័ន្ធយុត្តិធម៌ និងលើកកម្ពស់សិទ្ធិទទួលបានយុត្តិធម៌ សម្រាប់បុគ្គលគ្រប់រូបនៅមូលដ្ឋាន និងសហគមន៍ក្នុងព្រះរាជាណាចក្រកម្ពុជាឱ្យកាន់តែប្រសើរឡើង ។

នេះបេីតាមប្រសាសន៍របស់លោក បណ្ឌិត ជិន ម៉ាលីន រដ្ឋលេខាធិការប្រចាំការក្រសួងយុត្តិធម៌ និងជាអនុប្រធានប្រចាំការ នៃអាជ្ញាធរជាតិដោះស្រាយវិវាទក្រៅប្រព័ន្ធតុលាការ"អ.ដ.ក" តំណាងដ៏ខ្ពង់ខ្ពស់លោក កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ និងជាប្រធាន អ.ជ.ក បានអញ្ជើញ ជាអធបិតីភាពបេីកសិក្ខាសាលាផ្សព្វផ្សាយអំពី «បេសកកម្មនៃអាជ្ញាធរជាតិដោះស្រាយវិវាទក្រៅប្រព័ន្ធតុលាការ» ជូនដល់មន្ត្រីរាជការ រដ្ឋបាលក្រុង-ស្រុក អភិបាលក្រុង-ស្រុកទាំង៩ មេឃុំ-ចៅសង្កាត់ទាំង៦៧ទូទាំងខេត្តបន្ទាយមានជ័យ ប្រារព្ធធ្វើឡើងសាលាប្រជុំធំសាលាខេត្តបន្ទាយមានជ័យ នាថ្ងៃទី២៨ ខែសីហា ឆ្នាំ២០២៤។

លោក បណ្ឌិត ជិន ម៉ាលីន បន្តថានៅក្នុងនីតិកាលទី៧ នៃរដ្ឋសភា សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានប្រកាសដាក់ចេញនូវវិធានការគន្លឹះជាអាទិភាពចំនួន៥ដើម្បីសម្រេចឱ្យចេញជាលទ្ធផលនៅក្នុងអាណត្តិរបស់រាជរដ្ឋាភិបាលនីតិកាលទី៧ នៃរដ្ឋសភានេះ ក្នុងនោះ “ការពង្រឹង និងលើកកម្ពស់គុណភាពនិងប្រសិទ្ធភាពនៃប្រព័ន្ធយុត្តិធម៌ គឺត្រូវបានកំណត់ជាអាទិភាពដ៏សំខាន់មួយក្នុងចំណោមវិធានការគន្លឹះទាំង៥ និងបានប្រគល់ភារកិច្ចនេះជូនក្រសួងយុត្តិធម៌ ក្នុងការរៀបចំ ផែនការសកម្មភាពជាក់ស្តែងសំដៅធ្វើយ៉ាងណាសម្រេចឱ្យបាននូវកិច្ចការអាទិភាពសំខាន់ចំនួន៣ដោយ ក្នុងនោះកិច្ចការអាទិភាពទី១ គឺ “ការបង្កើតយន្តការដោះស្រាយវិវាទក្រៅប្រព័ន្ធតុលាការ បន្ថែមលើយន្តការ ដែលមានស្រាប់ ដើម្បីជួយសម្រុះសម្រួលដោះស្រាយវិវាទឱ្យបានឆាប់រហ័ស ជាពិសេស វិវាទរបស់ប្រជាពលរដ្ឋ នៅមូលដ្ឋាន”។

សូមបញ្ជាក់ផងដែរថា សិក្ខាសាលាផ្សព្វផ្សាយអំពី "បេសកកម្មនៃអាជ្ញាធរជាតិដោះស្រាយវិវាទក្រៅប្រព័ន្ធតុលាការ" ប្រព្រឹត្តទៅរយៈពេល៣ថ្ងៃ (ចាប់ពីរសៀលថ្ងៃទី២៨ ដល់ថ្ងៃទី៣០ ខែសីហា) ៕